დინამო თბილისმა, გაგრამ და ტყიბულის მეშახტემ მოიგეს

კრისტალბეთ ეროვნულ ლიგაში 23-ე ტური დასრულდა. ორშაბათს სამი მატჩი გაიმართა. სამ-სამი ქულა აიღეს დინამო თბილისმა, გაგრამ და ასევე ტყიბულის მეშახტემაც, რომელსაც 19-მატჩიანი მოუგებელი სერია ჰქონდა.
 

გაგრა 2:0 იბერია 1999 

გაგრა სწრაფი გოლით დაწინაურდა. გურამ გოშთელიანმა მეკარის მიერ მოგერიებულ ბურთს დაამატა და ანგარიში გახსნა. გოშთელიანმა ეს გოლი არ აღნიშნა: ის ხომ იბერია 1999-ში დიდხანს თამაშობდა და საერთოდ ამ კლუბის აღზრდილია.

საკვანძო მომენტი ვნახეთ მე-60 წუთზე, როცა იბერიელთა ნახევარმცველმა ნიკოლოზ დადიანმა შორიდან დაარტყა და ლამაზი გოლი გაიტანა, თუმცა არბიტრმა ირაკლი ხერხაძემ VAR-ზე გადაამოწმა, დადიანის გოლი გააუქმა და გაგრას სასარგებლოდ დანიშნა ჯარიმა: მანამდე ვაჰიდ სელიმოვიჩისგან წესების დარღვევა დააფიქსირა.

მერე კი გაგრამ მეორე გოლიც გაიტანა. ვიქტორ ბლიზნიჩენკომ კონტრშეტევა წამოიწყო, კარგი პასი გაუკეთა ალექსანდრე ფეიქრიშვილს, რომელიც წააქციეს. პენალტი დაინიშნა და დავით მუჯირმაც ზუსტად შეასრულა - 2:0.

გაგრა მერვე ადგილზე დარჩა. იბერია 1999 კი ბოლო ოთხ შეხვედრაში სამჯერ დამარცხდა და მეოთხე ადგილზეა, თუმცა ორი თამაში მარაგში აქვს.

ტორპედო 0:2 მეშახტე 

ტყიბულის მეშახტემ 19-მატჩიანი მოუგებელი სერია დაასრულა. მეშახტემ ქუთაისში აჯობა ტორპედოს...

90 წუთის განმავლობაში გოლი არ გასულა, მსაჯის მიერ დამატებულ დროში კი მეშახტემ ორჯერ გაიტანა. ჯერ ექს-ტორპედოელმა ცოტნე ფაცაციამ საჯარიმოს გარედან დაარტყა და ანგარიში 0:1 გახდა.

მერე კი ფაცაციამ კონტრშეტევაზე მათე კვირკვიას გააყოლა ბურთი, კვირკვიამ კი პასი გააკეთა და ცარიელ კარში გაატანინა გიორგი გოგოლაშვილს.

დინამო თბ 2:1 დილა 

დინამო თბილისმა სამი ქულა აიღო და მეორე ადგილზე გადავიდა. ახლა დინამოელები 5 ქულით ჩამორჩებიან რუსთავს და ერთი თამაშით ნაკლები აქვთ.

დინამოელები ნიკა ნინუას ლამაზი გოლით დაწინაურდნენ. ნინუამ საჯარიმოს გარედან ეფექტურად დაარტყა და 1:0.

მეორე ტაიმში სხვაობა ორბურთიანი გახდა: უელტონ კარვალიომ მარცხნიდან დაბალი პასი გააკეთა და მაქსიმ ტეიშეირამ დასწრებაზე გადაგზავნა ბურთი კარში.

დილამ 69-ე წუთზე დაძაბა მატჩი, კერძოდ, ბლანკსონ ანოფმა შორიდან ცახვეული დარტყმით შეამცირა სხვაობა.

დინამოელებზე დავწერეთ, დილა კი მეშვიდე ადგილზეა.