ვაწაძის მაკრატელა, სადებიუტო გოლები...

მეთორმეტე ტურიც მიილია კრისტალბეთ ეროვნულ ლიგაში. ორშაბატს ორი მატჩი გაიმართა. დინამო თბილისმა რუსთავს 3:2 მოუგო, ხოლო სპაერმა გაგრას 3:0 აჯობა...

რუსთავი 2:3 დინამო თბ 

დინამო თბილისმა ბოლო 4 შეხვედრაში, რაც გუნდს თემურ ქეცბაია წვრთნის, 10 ქულა აიღო. დინამოელებმა ამჯერად რუსთავს სძლიეს. გია ცეცაძის გაწვრთნილ გუნდს 7-მატჩიანი წაუგებელი სერია ჰქონდა.

თბილისელები პირველივე წუთზე, კერძოდ 44-ე წამზე დაწინაურდნენ. ნიკა ნინუას კუთხური, საჯარიმოში არეულობა და აბდულაი იოროს ახლოდან გატანილი.

რუსთაველებმა პირველი ტაიმის შუაში გაათანაბრეს. მამუკა კაპანაძის ჩაწოდებულს მოჰყვა იაპონელი იუტა ნაკანოს თავური და 1:1. ნაკანოს ბევრი გაჰქონდა ლიგა 3-ში და ლიგა 2-ში, კრისტალბეთ ეროვნულ ლიგაში კი ეს მისი პირველი გოლია.

38-ე წუთზე ნიკა ნინუას კარგ პასს მოჰყვა რუი მონტეირუს შესრულება და დინამო ისევ დაწინაურდა.

თუმცა მალევე, ბრაზილიელმა ჯექსონ კენიომ საჯარიმოს მისადგომებიდან დაბალი დარტყმით გაათანაბრა. ნაკანოსი არ იყოს, კენიომაც პირველად გაიტანა კრისტალბეთ ეროვნულ ლიგაში.

მეორე ტაიმში კი ერთი გოლი ვნახეთ, მათე ვაწაძე მშვენიერ ფორმაშია და ამჯერად მაკრატელა გაიტანა - 2:3. ვაწაძემ ბოლო 4 შეხვედრაში 4 გოლი მიითვალა.

სპაერი 3:0 გაგრა 

სპაერმა 7-მატჩიანი მოუგებელი სერია შეწყვიტა და გაგრას დიდი ანგარიშით სძლია. თავის მხრივ, გაგრამ ზედიზედ მესამედ წააგო.

პირველ ტაიმში ერთი გოლი გავიდა: გოჩა ცირდავას კუთხურიდან ჩაწოდებულ ბურთს მცველმა გიორგი ბუნტურმა შეაგება თავური. ბუნტურისთის სადებიუტო გოლია კრისტალბეთ ეროვნულ ლიგაში.

დაძაბული თამაში იყო, 73-ე წუთზე კი სპაერმა ორამდე გაზარდა სხვაობა: საბა გეგიაძის პასს მოჰყვა გიორგი ცეცხლაძის ზუსტი დარტყმა.

ბოლოს ისევ საბა გეგიაძე გამოირჩა, პენალტის უფლება მოიპოვა და გიგა სამხარაძემ გამოიყენა - 3:0.

სხვათა შორის, სპაერმა პირველ წრეშიც 3:0 აჯობა გაგრას.