დილა და გაგრა სამ-სამი ქულით

კრისტალბეთ ეროვნულ ლიგაში 23-ე ტური დასრულდა. გორის დილამ შინ თელავს მოუგო, ხოლო გაგრამ ფოთში აჯობა კოლხეთი 1913-ს.

დილა 1:0 თელავი 

გორელებმა ალექსანდრე ანდრონიკაშვილის გატანილი პენალტით გაიმარჯვეს. ეს 52-ე წუთზე მოხდა. პენალტი კი მას შემდეგ დაინიშნა, რაც თელავის მცველმა ლადო ოდიშვილმა საჯარიმოში ხელით ითამაშა. 

დილამ წლეულს სამიდან სამი მატჩი მოუგო თელავს, რომელიც ბოლოსწინა ადგილზეა. გორელები კი მეორე პოზიციაზე არიან და ისევ ორი ქულით ჩამორჩებიან ლიდერ იბერია 1999-ს. 

კოლხეთი 1913 1:2 გაგრა 

ფოთელებს 12-მატჩიანი მოუგებელი სერია აქვთ. ბოლოს თელავს აჯობეს 29 აპრილს (1:0). 

აი, გაგრამ კი ზედიზედ მესამედ მატჩში გაიმარჯვა და საკმაოდ დაშორდა საშიშ ზონას. 

გაგრა პირველი ტაიმის შუაში დაწინაურდა, როცა გაგრას შემტევი რიჩმონდ ადეიეიე გასცდა აკაკი გიუნაშვილს, დაბალი პას გააკეთა და ფოთელთა ფეხბურთელ გიორგი ხარებავას საკუთარ კარში აეჭრა ბურთი. 

კოლხეთმა პირველივე ტაიმში გაათანაბრა, კერძოდ, დიტო ფაჩულიამ გამოიყენა მეკარესთან პირისპირ გასვლა. 

ყველაფერი ფრისკენ მიდიოდა, მაგრამ 88-ე წუთზე ბრაზილიელმა კლაუდინეიმ საჯარიმოს მისადგომებიდან ძლიერად დაარტყა და გაგრა წინ გაიყვანა - 1:2. კლაუდინეი შეცვლაზე შევიდა. წლეულს ეს მისი პირველი გოლია კრისტალბეთ ეროვნულ ლიგაში.