ორი ფრე და ლიდერის გამარჯვება: იბერიელებს დადიანმა მოაგებინა

კრისტალბეთ ეროვნულ ლიგაში 23-ე ტური დაიწყო და სამი მატჩი გაიმართა. ლიდერმა იბერია 1999-მა სტუმრად სამგურალს მოუგო; დინამო ბათუმისა და ქუთაისის ტორპედოს შეხვედრაში ოთხგოლიანი ფრე ვნახეთ, ხოლო დინამო თბილისი და გარეჯი უგოლოდ დაშორდნენ ერთმანეთს.

სამგურალი 0:1 იბერია 1999 

ერთადერთი გოლი ახალგაზრდა ნახევარმცველმა ნიკოლოზ დადიანმა გაიტანა. ლუკა სილაგაძემ მარცხნიდან დაბალი პასი გააკეთა და დადიანმა ერთი შეხებით ზუსტად დაარტყა. ეს მოხდა მეორე ტაიმის საწყის წუთებში. 

მანამდე კი, 23-ე წუთზე სამგურალს გაუძევეს კაპიტანი დემურ ჩიხლაძე. მან ორი ყვითელი ბარათი მიიღო.

გია გეგუჩაძის გაწვრთნილი გუნდი 5 ქულით უსწრებს გორის დილას, რომელსაც ამ ტურში ჯერ სათამაშო აქვს. ისე საინტერესოა, რომ იბერელებმა ბოლო 4 მატჩი გოლის გაუშვებლად ჩაატარეს. და ზოგადად 23 ტურიდან 14 მშრალად ჩაატარეს...

სამგურალი კი მეშვიდე პოზიციაზეა.

დინამო თბ 0:0 გარეჯი

საგოლე მომენტი ბევრი არ ყოფილა. გამოსარცევია რამდენიმე ეპიზოდი, მაგალითად, როცა გიორგი ლორიამ ხელით 60-მეტრიანი პასი გააკეთა, ირაკლი სირაძემ მეტოქე ჩამოიშორა და კარგი პასით მოძებნა თირნიკე მორჩილაძე, რომლის დარტყმული ბურთიც ლუკა კუტალაძემ მოიგერია. 

ასევე, გარეჯის ცენტრალური მცველ თამაზ ცეცხლაძის თავგანწირული ვარდნა. შესაძლოა, იმ მომენტში გოლი გასულიყო. ეს მატჩის ბოლო წუთებში. გარეჯსაც ჰქონდა კარგი კონტრშეტევები.

დინამო თბილისს 5-მატჩიანი წაუგებელი სერია აქვს. გარეჯს კი 5 თამაშია არ გაუმარჯვია. 

დინამო ბთ 2:2 ტორპედო 

გოლებით თუ ავიღებთ, ბათუმელებმა დაიწყეს და დაამთავრეს, შუალედში კი ქუთაისელთა ორი გატანილი ვნახეთ. საბოლოოდ, 2:2.

პირველივე წუთზე, კერძოდ კი 26-ე წამზე გაიტანეს ზღვისპირელებმა: თორნიკე კირკიტაძემ თავისი სისწრაფე გამოიყენა, მეკარესაც გასცდა და 1:0...

35-ე წუთზე ვლადიმერ მამუჩაშვილის ჩაწოდებულ ბურთს კომნენ ანდრიჩმა თავურით კარში მიუჩინა ადგილი. მალევე, სორი მანეს დაფარულ პასს მოჰყვა ბიორნ იონსენის მეკარესთან პირისპირ გასვლა და ტორპედო წინ გავიდა...

82-ე წუთზე კი ბათუმელებმა გაათანაბრეს: გურამ ჯაფარიძის პასი და ალბანელი უერდი მარას დარტყმა ფილიპ კლიაიჩისთვის აურებელი გამოდგა. 

გუნდები მეოთხე და მეხუთე ადგილებზე დარჩნენ: ბათუმელები ორი ქულით უსწრებენ ქუთაისელებს.