იბერია 1999-მა და დინამო თბილისმა მოიგეს, ორი მატჩი ფრედ დასრულდა

კრისტალბეთ ეროვნულ ლიგაში მეექვსე ტურის ოთხი მატჩი გაიმართა. აქედან ორი ფრედ  დასრულდა, ორიც - ოთხბურთიანი სხვაობით. თბილისურმა გუნდებმა მოიგეს, დინამომ და იბერია 1999-მა.

გაგრა 0:4 დინამო თბ 

დინამოელებმა დიდი ანგარიშით გაიმარჯვეს. მე-19 წუთზე ნიკა ნინუამ საჯარიმოს მისადგომებიდან ძლიერი დარტყმით გახსნა ანგარიში, რამდენიმე წუთში კი ნინუამ ჩააწოდა და ლეო ასუნსეომ თავურით გაზარდა სხვაობა.

დინამო თბილისმა მეორე ტაიმშიც ორი გოლი გაიტანა. შეცვლაზე შესულებმა, ვახტანგ სალიამ და თეიმურაზ ოდიკაძემ სეზონში თავიანთი სადებიუტო გოლები მიითვალეს. სალიას შარშანაც გაჰქონდა, აი, ოდიკაძისთვის კი ეს საერთოდ პირველი გოლია კრისტალბეთ ეროვნულ ლიგაში. თანაც ლამაზი გოლი, საჯარიმოში მოატყუა მცველი და ახლო კუთხეში ზუსტად დაარტყა. - 0:4.

დილა 1:1 დინამო ბთ

ფრე გორში. დინამო ბათუმი იგებდა ჯალენ ბლესას გოლით. ბლესამ უერდი მარას პასის შემდეგ შორეულ კუთხეში დაბალი დარტყმით გაიტანა. ბლესამ წინა შეხვედრაში, დინამო თბილისთანაც მოახერხა გატანა და ბათუმელებმა მაშინ 1:0 იმარჯვეს.

ამჯერად კი ეს მომგებიანი გოლი ვერ გამოდგა. 79-ე წუთზე დილამ გათანაბრა, კერძოდ, ირაკლი ბუღრიძემ ჩააწოდა კუთხური და ალექსანდრე ანდრონიკაშვილმა თავურით 1:1 გახადა ანგარიში.

ბათუმელებს 12 ქულა აქვთ  (3 მოგება და 3 ფრე), წაუგებლად მიდიან წინ. დილას ერთი ქულით ნაკლები აქვს.

ტორპედო 1:1 სამგურალი 

იმერული დერბი ფრედ დასრულდა. ქუთაისის ტორპედომ ზედიზედ ოთხი მარცხის მერე პირველი ქულა აიღო და ჯერჯერობით მხოლოდ 4 ქულა აქვს. სამგურალი კი ცხრილის შუაშია 8 ქულით.

წყალტუბოელები იგებდნენ ჟან კარლოსის შორიდან გატანილით, მეორე ტაიმის დასაწყიში კი ფელიპე პირესმა გაათანაბრა - საჯარიმოში ბოლომდე იბრძოლა, მეკარე ნოდარ ყალიჩავას გასცდა და 1:1.

ანუ, ბრაზილიური გოლები ვნახეთ.  

იბერია 1999 4:0 კოლხეთი 1913

მოქმედი ჩემპიონის მორიგი გამარჯვება. იბერია 1999 ახლაც პირველ ადგილზეა. თბილისელებმა 4:0 მოუგეს ფოთის კოლხეთი 1913-ს.

პირველი გოლი გიზო მამაგეიშვილმა გაიტანა: ივა გელაშვილის პასის მერე ცენტრში თავით გაიგდო ბურთი წინ, სისწრაფეში ჩამოიტოვა მცველები და მეკარეს თავზე გადაუგდო ბურთი. მშვენიერი გოლი იყო.

54-ე წუთზე მამაგეიშვილმა პენალტი მოიპოვა და იური ტაბატაძემ შეასრულა - 2:0.

მეორე ტაიმის შუაში მცველმა ივა გელაშვილმა თავურით გაიტანა. სხვათა შორის, საგოლე პასიც თავურით იყო იური ტაბატაძისგან.

ბოლო ბურთი კი სურინამელმა დორასო კლასმა მიითვალა. ეს მისი სადებიუტო გოლია კრისტალბეთ ეროვნულ ლიგაში: შორიდან ძლიერი დარტყმით - 4:0.