დინამო ბათუმმა გაგრა ბოლოს გატეხა; იმერული დერბი ფრედ დასრულდა

კრისტალბეთ ეროვნულ ლიგაში 23-ე ტურის დარჩენილი ორი მატჩი გაიმართა. ლიდერმა დინამო ბათუმმა ბოლო წუთებზე გატეხა გაგრა და მოიგო, ხოლო წყალტუბოში სამგურალი-ტორპედოს იმერული დერბი ფრედ დასრულდა.

სამგურალი 0:0 ტორპედო 

წყალტუბოში ჩატარებული შეხვედრა უგოლოდ დასრულდა. სამგურალს უკვე 5 მატჩია არ მოუგია, ტორპედოს პირიქით, კარგი სერია ჰქონდა: ზედიზედ 4 მოგება და აი, მეხუთე ვეღარ მოახერხა. 

წყალტუბოელები მეხუთე ადგილზე არიან, ქუთაისელები კი მეექვსეზე. მათ შორის სხვაობა 5 ქულაა. 

სამგურალში ორ ფეხბურთელს ჰქონდა დებიუტი: კოტდივუარელ იკპე-გილენ გნამიასა და გიორგი სულაქველიძეს. 

გაგრა 0:2 დინამო ბთ 

წარმატებული გამოდგა ანდრი დემჩენკოს დებიუტი დინამო ბათუმის მწვრთნელის რანგში. ბათუმელებმა ბოლო წუთებზე გატეხეს გაგრას წინააღმდეგობა და სტუმრად 2:0 დაამარცხეს. 

ორივე გოლი მსაჯის მიერ დამატებულ წუთებზე გავიდა. ცოტნე ფაცაციას ჩაწოდების მერე გაგრელთა ფეხბურთელ ერეკლე სულთანიშვილს საკუთარ კარში აეჭრა ბურთი. მერე კი კონტრშეტევის შედეგად პაატა ღუდუშაურმა გაიტანა ახლო მანძილიდან. 

დინამო ბათუმი 7-ქულიანი უპირატესობით ლიდერობს, ხოლო გაგრა მერვე საფეხურზეა.