თბილისური დერბი: დინამომ საბურთალოს მოუგო

კრისტალბეთ ეროვნულ ლიგაში 23-ე ტურის კიდევ ერთი მატჩი გაიმართა: თბილისურ დერბიში დინამომ 2:1 მოუგო საბურთალოს.

საბურთალო 1:2 დინამო თბ 

საბურთალომ გორის თენგიზ ბურჯანაძეზე 1:2 წააგო დინამო თბილისთან. წლეულს ამ გუნდების წინა ორი დაპირისპირება ფრედ დასრულდა (0:0, 1:1), მესამე წრეში კი დინამოელებმა იმარჯვეს.

შეხვედრაში სამივე გოლი პირველ ტაიმში გავიდა: მე-20 წუთზე უსმანე კამარამ დინამოელთა მრავასვლიანი კომბინაცია დაასრულა გოლით; 26-ე წუთზე ულად-ომარ იმრანმა შორიდან ზუსტი დარტმით დინამოელთა უპირატესობა გაზარდა. ეს იმრანის პირველი გოლია ახალ კლუბში.

საბურთალოდან კი სხვაობა შეამცირა გიორგი გოჩოლეიშვილმა, რომელმაც ლევან ნონიკაშვილის კარგი პასი გამოიყენა - 1:2. გოჩოლეიშვილმა წინა ტურში დინამო ბათუმსაც გაუტანა.

რაც კრისტალბეთ ეროვნული ლიგა განახლდა, დინამო თბილისმა ზედიზედ სამჯერ მოიგო, საბურთალომ კი პირიქით - ზედიზედ მესამედ წააგო.

გიორგი ჭიაბრიშვილის გუნდი მეორე ადგილზეა და 6 ქულით ჩამორჩება ბათუმელებს, რომლებსაც ამ ტურში ჯერ სათამაშო აქვთ. საბურთალო კი ცხრილის შუაში, მეხუთეზეა.