ფრე იმერულ დერბიში - ტორპედომ სეზონი ქუთაისში ჩიხურასთან მატჩით განაახლა

• ტორპედო 2:2 ჩიხურა
• შეცვლაზე შესულმა ფანცულაიამ დუბლის გატანით ტორპედოს ქულა გადაურჩინა

ქუთაისის ტორპედომ 2020 წლის კრისტალბეთ ეროვნული ლიგის სეზონი, დღეს საჩხერის ჩიხურასთან მატჩით განაახლა, რომელიც ფრედ - 2:2 დასრულდა. რამაზ შენგელიაზე ანგარიში ჩიხურას გიორგი ბუხაიძემ გახსნა, რომელმაც გიორგი კორიფაძის მიერ დაწყებული შეტევა ზუსტი დარტყმით დაასრულა.

მეორე ტაიმი გუნდებმა აქტიურად დაიწყეს, 48-ე წუთზე ვაჟა ტაბატაძის მიერ დარტყმული თერთმეტმეტრიანი ხარიხას მოხვდა, ხოლო აქედან ზუსტად 1 წუთში ჩიხურამ ანგარიშის გაზრდა შეძლო. შოთა გვაზავამ გამოსვლაზე დემეტრე ბულისკერიას შეცდომით ისარგებლა და 49-ე წუთზე სხვაობა ორამდე გაზარდა.

მატჩის ბედი 57-ე წუთზე, მოედანზე ქუთაისელთა უკრაინელი ლეგიონერის - ვიტალი პონომარის ნაცვლად შესულმა გიორგი ფანცულაიამ გადაწყვიტა, რომელმაც დუბლის გატანა შეძლო. ორივე გოლი ფანცულაიამ გიორგი ივანიშვილის პასით გაიტანა და ბოლო წუთზე ვლადიმერ ხაჩიძის გუნდს ქულა მოაპოვებინა.